البيان المنتظر للمجلس السمكرى " وسلمولى على الثورة

-يتقتل المئات من ابناء شعب مصر فى مذبحة استاد بور سعيد ونقول عادى احنا فى مصر.

-تحصل ازمة وانتشار فيرس الحمى القلاعية ومنعرفش نحل الازمة ونقول عادى احنا فى مصر.
-متهمين امريكان يضربونا على قفانا كلنا ومصر لن تركع وعادى ممكن تضرب شقلباظ

-كمان مرض خطير يصيب الدواجن وبرضه نقول عادى احنا فى مصر .

-ومجلس شعب الصورى اللى مالهوش اى صلاحيات الناس كلها تبدأ تسب وتشتم فيه وبرضه نقول عادى ماهو مقدمش حل مفيد للناس علشان مالهوش صلاحيات .

- ازمة سولار بكملت يعنى ايه اللى حيحصل ما احنا فى مصر 

-تقف تمول عربيتك ساعات وساعات ياعم كبر ما طول عمرنا بنقف فى طوابير 

- متلاقيش تاكل ياعم عادى 

طب وبعدين 

ايه اللى بيحصل ده وليه احنا بنتعاقب ولا ايه

قربنا ننفجر خلاص اتخنقنا 

ايها السادة جارى شحن القنبلة 

قنبلة !!! قنبلة ايه 

انها مؤامرة دنيئة لو جلس احدنا يفكر ولو للحظات سيعرف اننا بصدد تخطيط عسكرى ماكر  يهدف نحو الدولة العسكرية المحتومة 

بالامس حاملتى سولار بمنطقة العامرية بالاسكندرية يتم القبض على سائقيها اثناء تفريغ الشحنة فى الطريق الصحراوى  وبالضغط على السائقين يعترفون ان المحرض هى شركة البترول نفسها !!!!!!!

وجارى شحن القنبلة .................................>

جريدة الاهرام بتاريخ السبت 24 \3 وعلى الصفحة الاولى اعلنت الجبهة الثورية لترشيح عمر سليمان للرئاسة    :)  ودى فيها ايه دى من حقه وكمان جبهة ثورية اللى رشحته ياسلام ياواد يا ثائر 

وعند تقليب الصفحات قليلا يشد انتباهك الخبر التالى المتهمان امام نيابة امن الدولة العليا تقاضينا 50 مليون جنيه من ايران لتفجير سفينة اسرائيلية بالممر لملاحى لقناة السويس !!!!!!! ياخبر :(    ياعم بقولك اهدى شوية الحمد لله اتقبض عليهم وخلاص 

وفى الصفحة التاسعة وطبعا بالبونط العريض ( اسرار حرب حكومة هنية  على مصر ) يا نهار اخوان  اهو ده بقه خبر لوحده كفاية لاستكمال المخطط 

لكن علشان الحبكة الدرامية 

بورسعيد وطبعا الجمهور  مشحون بالغضب من فترة من ساعة المذبحة التى التصق عارها بشعب بور سعيد وعود كبريت يترمى علشان قنبلة بور سعيد تنفجر وطبعا احداث شغب وطرف تالت ومحاولة لاقتحام قناة السويس ويجى البطل الهمام حامى حمى الوطن ويامر جنوده الاشاوس بحماية قناة السويس التى تعتبر من مكتسبات ثورة  الاباء المجيدة " على فكرة مجيدة بتدور على عريس"

طب وبعدين 

جارى شحن القنبلة ...................

دستور يعمله اخوان لا مش اخوان اسلاميون لا متاسلمون ويبدأ تنفيذ المرحلة التالتة من المخطط العبثى 

لتقسيم الشعب مرة تانية بس المرة دى الكل مشحون والكل عاوز ينفجر بس كل واحد فى اتجاه مختلف 

فكرنى بحدوته

كان ياما  كان  فى ملك ظالم وعنده قائد حرس ثعبان وفى يوم من الايام قام الشعب بثورة على الملك وعلشان قائد الحرس ثعبان قرر انه ينضم للاقوى واهى فرصة يبرطع فى القصر لوحده ولكن ايمانا من قائد الحرص بحق الشعب فى التظاهر السلمى يقرر الا يدخل القصر الا من يرضى عنه قائد الحرس ويدخل القصر مجموعات ظنا منهم انهم سيحمون الدولة ويستطيعون قيادتها الى بر الامان 

وفى الخارج يخرج الثعبان لسانه للثوار ليظن من خارج القصر ان المؤامرة تتم بمسمع ومرئى من بالداخل ولمن بالداخل يحذر الثعبان من مؤامرات خارجية دنيئة اشترك فيها الثوار  وحفاظا على سلامة الوطن على من بالداخل اتباع اللوائح والقوانين  التى تشعل غضب الثوار اكثرواكثر حتى يتم شحن القنبلة وينزل الفريقين الى الميدان وهنا يلقى عود الكبريت وينفجر الكل  ولكن هذه المرة كلا منهم فى اتجاه مختلف او ينفجر البعض والبعض الاخر يتوخى الحذر ويستخدم العقل لكن يتدخل البطل الهمام ليلقى بيانا هام ايمانا منا بشعب مصر العظيم ولحماية مكتسبات هذا الشعب  قرر المجلس الاعلى للقوات المسلحة اعلان الاحكام العرفية " تصفيق تصفيق " جارى القبض على المخربين والمخربين فى هذه الحالة معروفين 

وكل من يفتح فمه ويقول يسقط يسقط حكم العسكر اصبح من المخربين حينها والناس ستصفق عندما ترى رؤسنا معلقة على المشانق 

وذلك حفاظا على مكتسبات هذا الشعب وايمانا منا به 

وسلمولى على الثورة 

توقيع احد المخربين